Koronavirus infeksiyası ən çox harda toplanır? YENİ ARAŞDIRMA

Yeni koronavirusun nəcis və sidik vasitəsilə də yayılmasına dair indiyə kimi fikirlər səslənib. Çində koronavirusun bu yolla yoluxması barədə tədqiqat aparılıb. 

E-tibb.az xəbər verir ki, çinli alimlər bu araşdırma ilə koronavirusun təkcə təmas və ya hava-damcı yolu ilə ötürülmədiyinin sübut olunduğunu bildirirlər. Bu barədə “Emerging Infectious Diseases” jurnalında dərc olunan məqalədə deyilir. Mütəxəssislər, COVİD-19 xəstələrinin tullantı məhsullarını araşdırdıqlarını və nəcis nümunələrində olan canlı SARS-CoV-2 viruslarının eyni xəstələrin burun-udlaq yaxmalarında olandan daha yüksək konsentrasiyada olduğunu bildiriblər.

Alimlərin fikrincə, bu nəticələr COVID-19-un nəcis-oral və ya nəcis-aerozol yolu ilə yoluxma ehtimalını təsdiqləyir. Tədqiqatçılar virusun bu yolla yoluxmasını nəzərdən keçirməyin vacibliyinə dair xəbərdarlıq edir və xatırladırlar ki, 2003-cü ildə Honkonqda SARS virusunun yayılmasına səbəb də məhz bu olub. O zaman yaşayış kompleksindəki kanalizasiya problemləri üzündən yüzlərlə insan virusa yoluxmuşdu.