Yeriməsi pozulan gəncin onurğa kanalından iki şiş çıxarılıb

Respublika Müalicəvi Diaqnostika Mərkəzində (RMDM) uğurlu neyrocərrahiyyə əməliyyatlarından sonra gənc sağlamlığına qovuşub.

e-tibb.az-ın xəbərinə görə, Səhiyyə Nazirliyi Mətbuat Xidmətinin məlumatında bildirilir ki, 2011-ci ildə, xarici ölkədə pasiyentin 19 yaşı olarkən onurğa kanalında yerləşmiş 2 ədəd törəmədən yuxarıda yerləşəni çıxarılsa da, aşağıda yerləşən törəməyə toxunulmayıb.

Yeddi il sonra – 2018-ci ildə belində şiddətli ağrı, yerimənin və çanaq orqanlarının ləngimə tipli pozulması səbəbi ilə müraciət edən xəstənin MRT müayinəsində yuxarıda yer alan törəmənin təkrar inkişaf etməsi, aşağıda isə dəfələrlə böyüməsi aşkar edilib. Uzandıqda ağrıların ciddi artması səbəbi ilə xəstə oturaraq yatmaq məcburiyyətində qalıb.

Conus medullaris (aşağı ətraflara və çanaq orqanlarına gedən sinirlərin çıxdığı onurğa beyninin terminal hissəsi) onurğa beyninin həssas hissəsidir və bu nahiyənin əməliyyatları risklidir, təkrar əməliyyatlar isə daha da təhlükəlidir.

Yuxarıda yerləşən, conusu və burdan çıxan sinirləri saran törəmə Respublika Müalicəvi Diaqnostika Mərkəzinin (RMDM) neyrocərrahı Azər Əkbərov tərəfindən yeddi saatlıq əməliyyatla xaric edilib. Dörd ay sonra isə aşağıda yer alan törəmə çıxarılıb. Patoloji myxopapillary ependymoma raporlanıb. Əməliyyatdan sonra heç bir qüsur izlənilmədi və pasiyentin şikayətləri tam keçib.