23 Aprel 2019
Başqa oynaqlar kimi gicgah-çənə oynağının da xəstəlikləri var. Bu oynaqların çıxığı, iltihabı və digər xəstəliklərinə yaşından asılı olmayaraq, bir çox insanlarda rast gəlinir.
Bəs hansı əlamətlər gicgah-çənə oynağında problemlərin yarandığına dəlalət edir?
E-tibb.az bununla bağlı Azərbaycan Ağız və Üz-Çənə Cərrahları Cəmiyyətinin hazırladığı məlumatı təqdim edir:
Oynağın hərəkəti zamanı səsin, cırıltının yaranması, oynaq ətrafında ağrı, zəiflik, oynağın kilidlənməsi, hərəkət məhdudluğu, dişləmədə və dişləmə hissəsində dəyişiklik
kimi simptomları ola bilər.
Oynaq hərəkəti zamanı eşidilən səs, cırıltı diskin yerindən sürüşdüyünün bir əlamətidir və oynağın yerindən sağa-sola oynadığını göstərir: “Bəzən pasiyentlər çənə oynağı ilə əlaqədar olmayan şikayətlərlə gəlirlər. Məsələn, baş ağrıları, qulaq ağrısı, baş dönməsi, boyun və ənsə ağrısı. Ümumiyyətlə, bu simptomlara səbəb olan hal yuxudaykən insanın istəmədən dişlərini sıxması və ya qıcamasıdır”.
Qeyd olunub ki, belə hallarda ilk hədəf əzələ spazmasını və oynaq ağrısını aradan qaldırmaqdır. Bunun üçün ağrıkəsici dərmanlar və miorelaksanlardan (əzələ rahatlayıcı) istifadə edilir. Oynağın içinə steroidli dərmanlar inyeksiya edərək, ağrı və iltihab azaldıla bilər. Özü-özünü müalicə də təsirlidir və aşağıdakılardan ibarətdir:
çənə istirahəti
yemək yemədiyiniz vaxtlarda çənənizi açıq tutmaq
yumşaq yeməklər yemək
buz və isti tətbiqi
çənə idmanları
pozisiya idmanları