27 İyul 2019
Hamiləlik zamanı bir sıra vitamin, mineral komplekslərinin qəbul olunması tövsiyə edilir. Onlardan ən vacib olanlarından biri D vitaminidir?
Hamiləlikdə D vitamininin rolu nədən ibarətdir? Bu vitamin necə qəbul olunmalıdır?
e-tibb.az cərrah-ginekolog Nigar Abdullayevanın bununla bağlı fikirlərini təqdim edir:
Hamilə qadının qəbul etməsi vacib olan vitaminlərdən biri də D vitaminidir. Belə ki, digər maddələrlə yanaşı, D vitamini uşaq inkişafını təmin edir, həmçinin qadına hamiləlik boyunca enerji və güc verir.
Vitamin D niyə bu qədər əhəmiyyətlidir?
Vitamin D kalsiumun orqanizm tərəfindən mənimsənilməsinə kömək edir, sümük və dişlərin möhkəmliyini təmin edir. Bundan başqa, dölün sümüklərinin vəziyyəti hamiləlik zamanı qadın orqanizmində olan D vitaminindən çox asılıdır.
D vitamini hüceyrə membranının qoruyucu xüsusiyyətlərini gücləndirərək immun sisteminə müsbət təsir edir. Alimlərin yeni tədqiqatlarına əsasən, ürək və qan damarlarına da bu vitaminin çox faydası var. O diabetin, xərçəngin və sklerozun inkişafının qarşısını alır.
D vitamini hamiləlik zamanı nə qədər lazımdır?
Hamilələr üçün vitamin D-nin günlük dozası - 400-600 ME-dir. Bu, əsasən 3-cü trimestrdə lazımdır ki, dünyaya gələcək körpədə raxitliyin qarşısı alınsın.
Bəs D Vitaminin mənbəyi nələrdir?
Vitamin D qaraciyər və böyrəklər tərəfindən hasil edilir, həmçinin onu qidalardan və ən əsası Günəş şüasından əldə etmək olur. Hamiləliyi yay vaxtına düşənlər gün ərzində 10 dəqiqə Günəş vannası qəbul etməklə D vitamininə olan tələbatlarını tamamilə ödəyə bilərlər. Lakin buludlu, yağıntılı havalarda bu mümkün olmadığı üçün, süni ultrabənövşəyi şüaları qəbul etmək qətiyyən doğru deyil. Bu zaman tərkibində D vitamini olan ərzaqlara - ət, balıq, qaraciyər, yumurta sarısı, süd və göbələyə üstünlük verilməlidir. Məsələn, 100 qram siyənək və ya qızıl balıq vitamin D-ə birgünlük ehtiyacın təmin olunması üçün kifayət edəcək.
Amma qəbul edilən qidalar, Günəş şüası sizin bu vitaminə olan tələbatınızı tam ödəmirsə, bu zaman həkiminiz uyğun dozada tabletlər təyin edəcək.