Bu bacı-qardaş normal adamlardan 10 dəfə tez qocalır - FOTOLAR

Belçikadan olan bacı-qardaş - 20 yaşlı Mixil və 12 yaşlı Amber Vandevert nadir genetik çatışmazlıq olan proqeriya xəstəliyindən əziyyət çəkirlər. Bu xəstəlik zamanı orqanizmin vaxtından tez qocalmasına bağlı olaraq dəri və daxili orqanlarda dəyişikliklər baş verir.

e-tibb.az “The Daily Mail”-ə istinadən bildirir ki, Mixail və Amber normal adamlardan 8-10 dəfə tez qocalırlar.

Proqeriyadan əziyyət çəkən insanların əksəriyyəti 13 yaşa çata bilmirlər. Buna baxmayaraq, Mixil və Amber bu ölüm yaşını 26-a qədər artırmaq niyyətindədirlər.

Mixilə proqeriya diaqnozu 8 yaşında qoyulub. Amber doğulanda isə valideynləri lazım olan bütün analizləri verəndən sonra nəticələr onları şoka salıb: qızcığazda da eyni xəstəlik var. 

İllərdir ki, bacı-qardaş bir-birinə dəstək olmağa çalışır. Hətta məktəbdə öz ünvanlarına xoşagəlməz sözlər eşitməyə məcbur olanda belə, ruhdan düşməyiblər. Ancaq indi onların həmişə yanlarında olan dostları var. Hazırda Mixil və Amber onlara qarşı artan diqqətə daha rahat yanaşır, eniş-yoxuşlara rəğmən, həyatı doya-doya yaşamağa çalışırlar.  

Qeyd edək ki, proqeriya genetik kodda baş verən zədə nəticəsinə yaranan nadir xəstəliklərdəndir. 8 milyon nəfərdən birində müşahidə olunur. Bu xəstəliklə doğulan insanın bədəni və daxili orqanları normal insanınkından 8-10 dəfə sürətlə qocalır. Xəstəliyin ilk simptomları fizioqnomik quruluş və inkişaf geriliyində özünü göstərir. Saçın qismən və ya tamamilə tökülməsi, kəllə üzərində damarların gözə çarpan dərəcədə görünməsi, inkişaf etməyən üz strukturu, kiçik çənə quruluşu, kiçik burun, dişlərin gec çıxması və ya tamamilə olmaması, nazik, quru və sərt dəri, oynaq sərtliyi və bunun səbəb olduğu qeyri-normal duruş nəzərə çarpan xüsusiyyətlərdir. Bu tip pasiyentlərdə əksər halda osteoparoz olur. Proqeriyalı xəstələrin çoxu 13 yaşına çatmamış vəfat edir.