27 İyul 2019
Onurğa fəqərələri arasında disk yırtıqları son illərdə ən çox yayılan problemlərdən biridir. Bel yırtıqlarından sonra ikinci yerdə onurğanın boyun hissəsinin yırtıqlarına rast gəlinir. Yırtıqlar isə heç də hər zaman cərrahiyyə əməliyyatı ilə müalicə olunmur. Onların müalicəsində fizioterapiya, idman hərəkətlərinin çox böyük yeri var.
e-tibb.az fizioterapevt, uzman həkim Sənan Cəfərovun boyun disk yırtıqları zamanı evdə edə biləcəyimiz idman hərəkətləri barədə məsləhətlərini təqdim edir:
Boynunuzu gərərək başınızı önə və arxaya doğru hərəkət etdirin
Başınızı sağa və sola çevirin
Başınızı qulaqlarınız çiyinlərə yaxınlaşacaq şəkildə əyin
Çiyinlərinizi öncə yuxarı, sonra geriyə çəkin
Başınızı əllərinizlə geriyə doğru itələyib əks istiqamətdə dirənin
Əlinizlə başınızı itələyib başınızla əks istiqamətdə dirənin
Əllərinizi başın arxasında birləşdirin başınızı önə itələyib başınızla dirənin
Mütəxəssis deyib ki, bu hərəkətləri etməkdə məqsəd boyun əzələlərini gücləndirib təbii korset formalaşdırmaq, həmin bölgədəki onurğa sümüklərinə düşən yükü azaltmaq və bərabər paylamaqdır. Bu idmanlar eyni zamanda qan dövranını artırır, boyunun hərəkət həcmini geri qaytarır, normal duruş, rahatlıq yaradır, kürək və çiyin nahiyəsindəki tutulmanı azaldır.