Azərbaycanlı cərrah alim dünyada ilkə imza atıb

Professor Vaqif Qələndərin plastik və rekonstruktiv cərrahiyyədə kəşfi ABŞ-da qəbul edilib

Azərbaycanlı alim plastik və rekonstruktiv cərrahiyə sahəsində dünya üzrə bir ilkə imza atıb. Tanınmış cərrah, professor Vaqif Qələndərin süd vəzi rekonstruksiyası ilə bağlı Azərbaycan Tibb Universitetində (ATU) apardığı işlər və müəllifi olduğu yeni metodika ABŞ-da qəbul olunub.

ATU-nun mətbuat xidmətindən e-tibb.az-a verilən məlumata görə, professor Vaqif Qələndər bildirib ki, son 20 ildə süd vəzi rekonstruksiyası sahəsində olan elmi-praktiki fəaliyyəti və meyitlər üzərindəki işlərinin xəstələrə tətbiqinin nəticəsi ABŞ-da nəşr olunan beynəlxalq elmi jurnalda dərc olunub. Bu kəşf haqqında material “PRS Global Open” jurnalında 25 avqust 2020 tarixində çap edilib: “Ötən illər ərzində IMAP fleb metodikasının üzərində işləyərək daha təkmil bir cərrahi texnika yaratmağa və əməliyyatın ilk üç örnəyini müvəffəqiyyətlə tətbiq etməyə nail oldum. Türküyənin İstanbul şəhərinin Rekonstruktiv süd vəzi cərrahiyyəsi mərkəzinə dəvət etdilər, orada bu əməliyyatı uğurla həyata keçirdim. Bu üsulun süd vəzi Rekonstruksiyasında, xüsusilə seçilmiş hallarda - süd vəzinin orta və böyük ölçülərinin rekonstruksiyasında yeni bir era başladacağına əminəm”.