Azərbaycanda hər il 200-dən çox uşaq bu qan xəstəliyi ilə doğulur

Hər il Azərbaycanda 200-dən artıq uşaq talassemiya xəstəliyi ilə doğulur.

e-tibb.az xəbər verir ki, bu barədə Səhiyyə Nazirliyinin 8 May Beynəlxalq Talassemiya Günü ilə bağlı açıqladığı məlumatda bildirilir.

Məlumata görə, talassemiya xəstəliyinin ən ağır formalarına əksər hallarda qan qohumluğu olan nikahlarda təsadüf edilir. Qeyd olunub ki, ölkəmizdə son illərdə talassemiyanın müalicəsi və diaqnostikası istiqamətində mühüm tədbirlər görülüb.

Azərbaycan Respublikası Prezidentinin 2015-ci il 10 fevral tarixli Sərəncamı ilə təsdiq edilmiş “Talassemiya ilə mübarizəyə dair 2015-2020-ci illər üçün Dövlət Proqramı” talassemiyanın profilaktikasının gücləndirilməsinə, əhali arasında maarifləndirmə işlərinin aparılmasına və talassemiyalı xəstələrə göstərilən tibbi yardımın təkmilləşdirilməsinə yönəlib.

Heydər Əliyev Fondunun təşəbbüsü ilə Respublika Talassemiya Mərkəzinin yaradılması nəticəsində bu xəstələrin müalicəsinin müasir səviyyədə təşkili mümkün olub. Görülən tədbirlər nəticəsində talassemiyalı xəstələrin normal həyat fəaliyyəti təmin olunub, bu xəstəlikdən əlillik və ölüm halları azalıb.

Qeyd edək ki, valideynlərdən uşağa gen vasitəsilə keçən ağır irsi qan xəstəliyi olan talassemiya-genetik defekt nəticəsində hemoqlobin sintezinin pozulması və xroniki anemiya ilə xarakterizə olunur. Talassemiyanın ən ağır formalarına əksər hallarda qan qohumluğu olan nikahlarda təsadüf edilir.

Azərbaycanda 1 milyondan çox talassemiya daşıyıcısının olduğu bildirilir. Amma daşıyıcılar xəstə deyil, onların sağlam insanlardan fərqi yoxdur. Əgər nikaha daxil olacaq şəxslərdən birində talassemiya daşıyıcılığı varsa, dogulacaq uşaqlar ya sağlam, ya daşıyıcı olacaq. Yəni tərəflərin birində daşıyıcılığın olması zamanı evlilik qorxulu sayılmır. Ancaq nikaha daxil olan tərəflərin hər ikisi daşıyıcıdırsa, o zaman 25% sağlam, 50% daşıyıcı, 25% isə xəstə uşaq doğulma ehtimalı vardır. Buna görə də mütəxəssislər evlilik öncəsi daşıyıcılığın təyin olunmasını vacib hesab edirlər. Hər iki tərəfin daşıyıcı olması durumunda ailə məlumatlandırılır və dölün ana bətnindəykən genetik müayinəsi məsləhət görülür…