Alimlər indi də 3D-printerdə ürək üçün “ehtiyat hissələri” “çap ediblər”

3D-çap texnologiyasından yalnız əyləncə və ya müxtəlif mexanizmlər üçün ehtiyat hissələrinin yaradılması məqsədilə istifadə olunmur. Amerikalı bioloqlar ilk dəfə insan ürəyinin süni fraqmentlərini yaratmağa nail olublar.

ict.az-ın xarici mediaya istinadən verdiyi məlumatda bildirilir ki, Karneqi-Mellon Universitetinin tədqiqatçıları tibb sahəsində əldə etdikləri mühüm nailiyyət haqqında məqalə dərc ediblər. Onlar insan ürəyinin canlı toxumanın funksiyasını yerinə yetirən bəzi tərkib hissələrini çap edə biliblər. İnsan bədənində bütün orqanları formalaşdıran xüsusi hüceyrələr normalda hüceyrədən kənar matrislə birlikdə “yapışdırılırlar”. Bu, hüceyrələri birləşdirən kollagendən ibarət “tor”dan təşkil olunub və orqanların işləməsi üçün lazım olan biokimyəvi siqnalların ötürülməsini təmin edir.

Tədqiqat işinin həmmüəlliflərindən biri olan Endryu Hadsonun sözlərinə əsasən, laboratoriya sintezi zamanı kollagen mayedən təşkil olunur. Buna görə də çap üçün qan damarlarının, işləyən ürək qapaqları və mədəciklərinin strukturunu müvəqqəti saxlamağa kömək edən xüsusi hidrogeldən istifadə edilib. Çap prosesindən sonra geli otaq temperaturuna qədər qızdıraraq, konstruksiyadan asanlıqla silmək olar. Bu zaman hazır kollagen struktur olduğu kimi qalacaq.

Hələ ki, süni ürəyin yaradılmasından söhbət getmir. Lakin bioloji 3D-çap texnologiyasının artıq bir neçə il sonra donor orqanlarının çatışmazlığı problemini həll edəcəyi gözlənilir.

Qeyd edək ki, bir qədər əvvəl İsrail alimləri dünyada ilk dəfə olaraq insan toxumasından hazırlanan ürəyi 3d formatında “çap ediblər”.

İsrailin Təl-Əviv Universitetinin laboratoriya rəhbəri, professor Tal Dvir xəstədən götürülən toxumalardan hazırlanan süni ürəyi 3d printerdən istifadə edərək “çap edib”. Printerin ürəyi “çap etməsi”nə 3 saat yarım vaxt sərf olunub. Ürək təxminən 2,5 santimetrdir və dovşan ürəyinə bənzəyir.

Bu üsulla bir neçə ürək “çap olunub” və hazırlanan süni ürəklər ilkin eksperiment olaraq heyvanlara nəql olunacaq.

e-tibb.az